Orðið smá síðan ég skrifaði hérna síðast…hugsa að ég verði meira virk þegar styttist í þetta og líka eftir. Ég hugsa mikið um hvað breytist þegar ég verð orðin léttari. Hugsa að það sem verði mesti léttirinn eru allir litlu hlutirnir sem samt vega svo mikið. Eins og bara það að þurfa ekki að hafa áhyggjur af því að passa í flugsæti, geta keypt mér 66N úlpu (ekki að ég hafi efni á því en væri samt gaman að passa í hana 🙂 geta rólað í rólu og hangið í hengirúmi án þess að hafa áhyggjur að því að tré falli saman, nei smá grín 🙂 ég er í hóp á facebook með fólki sem hefur farið eða er að fara í offituaðgerð. Þar voru tvær sem hittust í Leifsstöð og fannst svo dásamlegt að geta setið með krosslagðar fætur án nokkura vandræða. Það hef ég ekki gert í fjölda mörg ár og það eina smáræði segir svo margt. Þegar fólk, sem hefur farið í svona aðgerð, er spurt hvort það sjái eftir einhverju þá er lang algengasta svarið: AÐ HAFA EKKI FARIÐ FYRR. Ég segi fyrir mitt leyti að ég er fyrst núna tilbúin. Ég er búin að lesa og lesa og lesa um þetta og þykist vita hvað ég er að fara út í. Líklega mun ég finna fyrir söknuði vegna matar sem ég get ekki borðað en hitt sem á móti kemur er meira virði. Að geta labbað með manninum mínum dagleið upp á hálendi (í nýju 66N úlpunni minni) hjólað og jafnvel hlaupið með honum stífluhringinn verður alveg þess virði að geta ekki fengið mér KFC 😀 hlakka til…svo mikið til

Knúz til ykkar

Issa byssa

Svo við höldum áfram þar sem frá var horfið þá fór ég að hitta Aðalstein lækni, hjá Klíníkin Ármúla, 20. júní sl. Upphaflega ætlaði ég að fara í ermina en hann sagði að sökum bakflæðis þá væri það ekki góður kostur fyrir mig. Ég sagði honum að ég væri pínu hrædd við hjáveitu því ég hafði heyrt misjafnar sögur af því. Þá kynnti hann mig fyrir svokallaðri mini hjáveitu sem væri búin að ryðja sér til rúms út í hinum stóra heimi. Þetta væri ekki þekkt aðferð á Íslandi en hann væri búinn að gera nokkrar hér og gekk mjög vel. Tíðni aukaverkanna á að vera lægri með þessari aðferð sem er náttúrulega mjög jákvætt og þar sem hann Aðalsteinn er mjög sannfærandi maður þá ákvað ég að stökkva í djúpu laugina og panta tíma í aðgerð. Áður en ég fer í aðgerðina þarf ég að léttast um að minnsta kosti 7 kg til að minnka ummál lifrarinnar sem er betra á aðgerðadegi. Hann lét mig fá nokkra kúra til að léttast hratt, þar á meðal hrökkbrauðskúrinn sem ég ákvað að prófa. Í stuttu máli þá borða ég 6 hrökkbrauð á dag og mikið grænmeti. Ég hef val um nokkrar gerðir áleggs og má svo borða kjúkling, feitan fisk eða magurt kjöt á kvöldin en í mjög litlu magni. Ég má bara innbyrða 800-900 hitaeiningar á dag sem verður að teljast mjög lítið. En þetta er að ganga alveg svakalega vel og í dag er ég búin að missa 4,3 kg á aðeins 2 vikum. Ætti að ná því að léttast um 3 kg í viðbót fyrir 22.ágúst ef ég held mínu striki. Verður nú samt að viðurkennast að það er ansi erfitt að vera í þessum kúr núna þegar sumarfríið er að detta í hús en ég get,ætla, skal ná þessu 🙂 Áfram ég!! Hafið það gott elskurnar, þar til næst

Issabyssa 🙂

p.s set með skýringarmyndir af minihjáveitu og stórri hjáveitu (RNY)